Jakša Fiamengo

Sutra će te ponit njih šest meðu ruke
Mater će naricat, teško brecat bilo
Finili su ćaća tvoji trud i muke
Kamena će ploča pokrit tvoje tilo

Dušu si razumi smokve i rogača
Ka svoj i naš život pristave si zida
Sutra će te odvest okle se ne vraća
A vrh stola prazna ostat će katrida

Rodilo je zlatom sve ča god si taka
Nek ti na sve vike zemlja bude laka
Pokrila te ploča sad smo mi na tratu
Triba nam odradit život ka žurnatu

Istrajat će tilo, dat se neće stina
A i ti si s nama i neka te nima